Lian Akademiku
EDUKASAUN no DEZEMPREGU (Hanoin Ruma Relasiona ho Situasaun Ohin Loron)

Antonio Jose Castro da Cunha, S.T.,M.M.
Economia no Negosiu (FEN)
Kuarta, 11 Julhu 2018 | 145 View

Normalmente, nasaun post conflict ka nasaun terceiro mundo sira sempre infrenta problema “klásiku”. Mukit, ki’ak, beik, malnutrisaun, “hamlaha”, konflitus no dezempregu. Situasaun hirak-ne’e nu’udar kauzas ne’ebé mósu no sempre hamaluk nafatin prosesu dezenvolvimentu iha nasaun hirak refere. Husi problema “klásiku” ne’ebé temin iha leten, rezolve beik no dezempregu hanesan xave prinsipál atu nasaun terceiro mundo sira bele “haksoit” sai husi situasaun hirak ne’e. Dala ruma ita husu ba malu nune’e, Kok bele?

Beik iha kontekstu ida-ne’e, la-signifika katak lee no hakerek la-hatene. Maibe beik, tuir ha’u, nia sentidu maka ema (individu) ne’ebé la-iha kapasidade no abilidade atu kore-an husi problema hirak ne’ebé nia infrenta. Ema ne’ebé maka beik, sempre “goma-metin” ho dezempregu no problema “negativu” seluk ne’ebé temin ona.

Tanba-ne’e, dalan ida atu “haksoit” sai husi beik maka edukasaun. Edukasaun halo ema hatene siensia no domina teknolojia. No hirak hanesan-ne’e, dala-barak ema temin edukadu. Ema ne’ebé edukadu (la-os hotu), sempre iha kapasidade no abilidade atu rezolve nia problema rasik. Tanba sá? tanba nia bele buka ou kria empregu ba nia an-rasik no ba ema seluk.

Ita bele haree nasaun hirak-ne’ebé avansadu los-ona. Maioria populasaun mesak edukadu hotu de’it. Ida-ne’e mós hatudu oinsa nasaun hirak-ne’e bele eziste no kompete iha mundo modernu ohin-loron. Liu-husi edukasaun, bele mósu jerasaun ida-ne’ebé kualifikadu hodi garante ezistensia no kompetividade iha interkomunikasaun no kompetisaun mundo globalizadu.

Oinsa ho Timor-Leste? Maluk sira, hanesan ita hotu hatene ona, husi inisiu kedas, governu troka dala hitu (7) ona, edukasaun sempre sai atensaun no prioridade prinsipál hamutuk ho infrastrutura no saude. Hafoin restaura fali independensia iha tinan 16 liu-bá, Timor-Leste adopta kedas prinsipiu edukasaun ba ema hotu. Katak timoroan hotu-hotu, riku ka ki’ak, foho-oan ka sidade-oan, boot ka kiik, iha direitu ne’ebé hanesan asesu ba edukasaun hodi hetan matenek no domina siensia i teknolojia.

Iha situasaun Timor-Leste ohin-loron, dezenvolvimentu edukasaun (formál) sei infrenta dezafius no obstaklu boot tebes. Infrastrutura bázika, kuríkulu, fasilidades, laboratoriu, kualifikasaun professores, aproveitamentu estudantes, hirak-ne’e hotu sai hanesan dezafius ne’ebé maka durante iha tinan sanulu resin neen ne’e Timor-Leste infrenta. Maske-nune’e, governu kontinua ho esforsu tomak hadi’a tuir nesesidades no prioridades ne’ebé iha.

Ensinu gratuitu tuir mandatu konstituisaun haruka, fo duni kbi’it no forsa ba timoroan hotu atu aprende hakerek, lee no sai ema matenek i útil ba an-rasik, familia, sosiedade, nasaun no mundo. Matenek, liafuan ida ne’ebé iha forsa as tebes hodi dada timoroan hotu atu hamrík hanesan ho ema husi mundo tomak.

Ita hotu senti orgullu bainhira akompaña no haree ho matan, entuziasmu, dezeiju no esperansa timoroan hotu atu bele asesu ba edukasaun. To’o ohin-loron, 95% labarik timoroan tau naran ona ba eskola, hahu husi Pre-Eskolar ba to’o Ensinu Sekundariu. Joven barak kontinua sira nia estudu iha Ensino Superior hodi hasai lisensiatura, no adultu lubuk ida maka reforsa sira nia matenek iha mestradu to’o dotoramentu. Maske-nune’e, ita mós konsiente katak, barak maka la-konsege akaba sira nia estudu, tanba ejizensia moris ne’ebé iha. Dadus ne’ebé iha, mós hatudu katak númeru dizistentes timoroan husi eskola as tebes.

Maluk sira, tinan-tinan timoroan rihun maka kontinua sira nia estudu ba ensino superior. Barak iha rai-laran, rihun mós sai ba nasaun seluk. Balun kontinua ho bolso estudu (governo no parseirus), barak mós husi esforsu rasik (familia/inan-aman). Indonezia, Tailandia, Filipina, Brazíl, Portugál, Austrália nu’udar fatin destinasaun ba timoroan buka matenek nian. Balun bele aproveita ho di’ak no ikus fila mai hatudu duni sira nia kualidade hodi kontribui positivamente ba dezenvolvimentu nasaun ida ne’e. Maibe barak mós maka lahetene atu halo los sa-ida. Estrañu liu-tan, universitarius barak mós maka “rende” de’it iha dalan klaran, iha ne’ebé ikus mai “halai” ba Inglatera no Irlanda hodi hatutan moris.

Dezempregadu edukadu kontinua aumenta tinan ba tinan. Tanba-sá? Tanba timoroan edukadu (dezempregadu) hirak ne’e la iha skill ka badaen ne’ebé sufisiente atu tama no kompete iha kampu traballu. Se nune’e, sa ida los maka sala? Empregu maka la-iha ka timoroan maka la-prontu? Hanoin lisuk ba. Ita hotu dala ruma “baku” hirus-matan, maibe ita atu hirus los se? governo? Karik bele. Buat balun ne’ebé maka to’o oras ne’e “la’o la-los”, ita bele “komu liman” ba governo. Maibe barak liu, ita idak-idak maka tengki responsabiliza.

Tuir rezultadu peskiza husi Timor-Leste Labour Force Survey 2013 (TL-LFS), rezulta katak estimativa timoroan ne’ebé to’o ona tinan atu servisu hamutuk 692,200. Husi totál ne’e, 213,200 maka hanesan ona forsa traballu. Númeru ida-ne’e, tuir TL-LFS 2013, reprezenta taxa partisipasaun forsa traballu ne’ebé ki’ik tebes (30.6%). Dadus mós hatudu katak, husi totál forsa traballu ne’ebé iha, 189,800 nu’udar empregadu no 23,400 ka 11% nu’udar dezempregadu.

Hafoin lori tinan naruk, nasaun ida-ne’e konsiente katak dezempregu ne’ebé ohin-loron Timor-Leste infrenta, kauza ida maka tanba timoroan rasik la iha skill no badaen atu kompete ho ema estranjeirus. Traballadores estranjeirus ne’ebé servisu iha nasaun ida-ne’e, manan salariu boot, la’os tanba sira ema estranjeiru, maibe liu-liu tanba sira nia skill no produtividades as liu timoroan sira-nian.

Tanba-ne’e, Timor-Leste nu’udar nasaun presiza iha vizaun ida estratéjiku no inovativu hodi hahú prepara jerasaun timoroan ne’ebé, la’os de’it kualifikadu maibe mós iha kompetividade. Nasaun ida-ne’e, tantu governo komu setor privadu tengki hanoin ona, tinan 5, 10 ou 20 mai, kampu traballu Timor-Leste presiza timoroan ida ho skill oin-nusa los.

Maluk sira, sé ita akompaña politika Governo nian ne’ebé trasa liu husi Ministeriu Edukasaun, maka ita haree katak Governo ohin-loron hahú foku ona atu dezenvolve edukasaun, liu-liu iha área tékniku vokasionál. Iha governo konstitusionál da-hitu, governu hahú fazeada i gradualmente konverte Ensinu Sekundariu Jerál ba Ensinu Tekniku Vokasionál. Governo mós planea ona atu inisia Akademia Peska i Estudus Marinus no Politkeniku Hotelaria i Turismu iha tinan-tinan sira tuir-mai.

Ida-ne’e programa ida inovativu tebes. Objetivu prinsipál husi programa ne’e maka, atu prepara timoroan bele kompete iha kampu traballu tinan 5, 10 ou 20 mai. Timor-Leste ba futuru, nesesita tebes atu iha tékniku ne’ebé kualifikadu ho abilidade as. Lia-fuan xave maka ne’e “Timoroan hotu tengki iha valór kompetividade”. Brevemente ita bele ko’alia katak ensino tekniku (sekundariu no terciariu) prepara timoroan atu sai kreativu no inovador. Matenek na’in ida naran Jack Welch, GE hateten nune’e “If you don’t have a competitive advantage, don’t compete”.

Prezensa Ensinu Tekniku Vokasionál, Akademia, Politekniku nu’udar alternativas ida-ne’ebé governo sei dezenvolve hodi responde dezempregu iha futuru. Tanba-ne’e, ha’u hanoin pasu ne’ebé Ministeriu Edukasaun foti, nu’udar hakat ida importante no estratéjiku tebes. Maske ita hotu konsiente, katak programa hirak-ne’e hotu sei presiza provas no lori tempu hodi bele responde. Ema barak bele dúvidas, maibe konkorda ou lae ensinu tekniku (sekundariu no tersiariu) sei haraik solusaun ba dezempregu no forsa traballu unskilled iha nasaun ida-ne’e.

Ema matenek sira bain-bain temin nune’e, “O Nia Futuru Iha O Nia Liman Rasik”. Fraze ida ne’e fo sentidu ne’ebé kle’an tebes. Agora, ita (timoroan) idak-idak maka tengki reflekte. Sa-ida maka sai nu’udar ita nia paisaun. Sa-ida maka sai ita nia mehi iha futuru. Tanba ne’e, atu realiza mehi no paisaun ne’ebé iha, maka ema idak-idak tengki trasa planu ba sira-nia moris rasik. Matenek ida naran Casey Stengel hateten nune’e “If you don’t know where you’re going, you might end up somewhere else”. No ha’u konkorda tebes ho lia-fuan ne’e.

Maluk sira, Timor-Leste nu’udar nasaun tengki hahú ona ho pasu estratéjiku ida-ne’e. Pasu estratéjiku ne’ebé bele dezenvolve no hahoris jerasaun timoroan ho koñesementu tékniku, domina siensia, teknolojia no iha kompetividade as atu kompete ho se-se de’it. Tanba se-lae, ema estranjeirus sei mai domina nafatin, no ita, timoroan sei sai ESPEKTADORES ne’ebé “di’ak” iha ita nia uma-rasik.

 

KAMPUS

Campus A Akadiruhun

Akadiruhun Bidaun Dili

iobtiles02@gmail.com

+670 7833 0608


Campus B Avenida Luromata

Avenida Luromada Komoro DILI

iobtiles02@gmail.com

+670 7833 0608


Campus C Fomentu II

Rua Fomentu II Komoro DILI

iobtiles02@gmail.com

+670 7833 0608


Campus D Fomentu II

Rua Fomentu II Komoro DILI

iobtiles02@gmail.com

+670 7833 0608