Lian Akademiku
Kualidade Edukasaun Timor-Leste, Se Los Mak Responsabiliza?

Antonio Jose Castro da Cunha, S.T.,M.M.
Economia no Negosiu (FEN)
Kuarta, 11 Julhu 2018 | 382 View

Iha tinan sanolu resin-neen (16) nia laran, progresu dezenvolvimentu iha Timor-Leste komesa hatudu nia lalatak. dezenvolvimentu Timor-Leste depois de restaurasaun independensia, komesa buras iha áreas oin-oin. Infrastruturas bázikas, saude, edukasaun, ekonómia, sai hanesan ai-riin prinsipál haat ne’ebé durante ne’e tane no hatada moris povu tomak nian. Prinsipiu hirak-ne’e, konsagra ona iha konstituisaun da RDTL artigu 6.0 konaba objetivu estadu nian.

Husi ai-rin haat ne’ebé maka iha, edukasaun sai nu’udar baze fundamentál ida, hodi hatu’ur no prepara jerasaun futuru ida-ne’ebé iha kapasidade no abilidade atu ukun i dezenvolve nasaun doben Timor-Leste. Ba ida-ne’e, Estadu no governu iha dever no obrigasaun hodi fo oportunidade ba timoroan hotu atu bele asesu ba edukasaun, nune’e bele iha garantia ba sira-nia futuru moris di’ak futuru. Liafuan hirak-ne’e reflekta iha artigu 59.0 konaba edukasaun no kultura, iha númeru 2 ne’ebé deskreve “Ema hotu iha direitu hanesan, ba oportunidade atu eskola no ba formasaun serbisu/profisaun nian”. Hanoin ida-ne’e reforsa mós iha númeru 4 ne’ebé deskreve “Estadu tenki garante ba sidadaun hotu-hotu, tuir sira-nia kapasidade, atu bele hetan eskola boot kona-ba investigasaun sientífika no hamoris/haburas arte”.

Tinan sanolu resin-neen ona, hafoin Timor-Leste restaura fali nia independensia, governo kontinua esforsu maka’as tebes hodi investe iha area edukasaun. Estabelesimentu infrastruturas bázikas, kualidade-dus-profesores, kualidade-du-ensinu, sai hanesan obstaklu boot ne’ebé maka durante ne’e governu Timor-Leste infrenta. Maske nune’e, ita hotu konsiente katak, atensaun ne’ebé governo fó, seidauk balansu ho orsamentu ne’ebé adekuadu. Ida-ne’e, indiretamente haraik mós impaktu ba dezenvolvimentu kualidade edukasaun iha Timor-Leste.

 

Situasaun Jerál.

Durante dékade ikus-ne’e, eskola moris buras tebes iha teritóriu Timor-Leste laran tomak. Hahú husi Ensinu Pre-Eskolár, Ensinu Báziku, Ensinu Sekundáriu Jerál no Tekniku Vokasionál inklui Ensinu Superior. Tuir dadus husi Ministeriu Edukasaun, oras-ne’e iha teritóriu Timor-Leste laran tomak, eziste ona Ensinu Pre-Eskolar hamutuk 425 ho númeru professores 713 ne’ebé maka hanorin 16,350 alunus, Ensino Báziku iha 1,263 ho totál professores 9,781 ne’ebé maka hanorin 340,71 alunus, Ensino Sekundáriu Jeral no Tekniku Vokasional iha 111 ho total alunus 91,943 no Ensinu superior iha 11 ho totál docentes 1,894 ne’ebé maka hanorin 36,036 estudantes universitarius. Tebes, eskolas sira mosu buras tebes iha nasaun doben ida ne’e. Dala ruma ita haré, eskolas ida ho sanak iha fatin-fatin (filiais). Públiku dala braka kestiona maka’as, tanba haree ba eskola hirak-ne’ebé loke hanesan loos loke kios. Se-loos mak sei responsabiliza ba ida ne’e? Governu? Dala barak komunidade sira “obriga” loke eskola, maibé bainhira hetan difikuldades ona, salah hirak-ne’ebé iha “tuda” hotu de’it ba governo.

Perguntas maka ne’e, serake loke eskola barak ne’e sala? Klaru katak lae. Ida-ne’e, bazeia ba konstituisaun RDTL artigu 59.0 N0. 2, ne’ebé Reforsa mós husi prinsipiu gerál sira edukasaun nian. Iha artigu 2.0 númeru 4, prinsipiu edukasaun nian deskreve nune’e “É da especial responsabilidade do estado promover a democratização do ensino, garantindo o direito a uma justa e efetiva igualdade de oportunidades no acesso e sucesso escolares” (Fontes: As Bases Legais do Sistema Educação de Timor-Leste). Portantu lei fo-dalan. Maibé, ita presiza kestiona no senti preukupadu, tanba eskola hirak ne’ebé mak loke, sira-nia fundamentu organizasaun fraku tebes. Professores (mestri/mestra) sira nia abilidade no kõñesimentu, maioria sei menus tebes. Buat hirak-ne’e hotu ikus mai kontribui positivamente ba kualidade edukasaun no estudante sira hotu iha prosesu aprendizajen nia laran.

Dilema seluk ne’ebé edukasaun Timor-Leste infrenta maka lian atu hanorin. Bazeia ba konstituisaun RDTL artigu 13.0 konabá lian ofisiál no nasionál, númeru 1 hateten dehan “RDTL nia lian ofisial maka tetum no portugues”. Enkuantu iha lei-de-baze Edukasaun, artigu 8.0 konabá lingua do sistema educativo deskreve katak“As línguas de ensino do sistema educativo timorense são o tétum e o português”. Agora realidade maka-ne’e, maioria hosi profesores (mestri/mestra, dosente) la-domina lian rua-ne’e. Se ita la-domina lian nasionál sira-ne’e, oinsá maka bele mosu interaksaun ida di’ak no kualidade entre profesores no estudantes sira iha sala-de-aula laran?

Dezafius seluk ne’ebé edukasaun Timor-Leste infrenta maka, bainhira estudantes sira atu kontinua ba iha ensinu superior. Realidade ohin-loron, maioria ensinu superior iha Timor-Leste, iha sira-nia prosesu aprendijazem loroloron sei utiliza lian Indonezia hanesan lingua intermediaria. Ida-ne’e difikulta tebes estudantes hirak-ne’ebé akaba sira-nia estudu iha nivel ensinu sekundariu, tanba antes ne’e utiliza barak-liu lian portugés. Agora perguntas maka-ne’e, serake lingua sai hanesan bareira boot ba kualidade edukasaun iha Timor-Leste?

 

Papél Stakholder Sira-Nian.

Haree ba situasaun hirak--ne’e, klaru duni katak governu liu-husi Ministeriu Edukasaun, Juventude no Kultura iha papél importante tebes atu prepara kondisaun no ambiente ida di’ak no saudavel hodi garante funsionamentu no estabilidade ba eskolas hotu ne’ebé pertense nu’udar eskolas públika. Formasaun ba professores ne’ebé maka tinan-tinan sempre hala’o iha Instituto Nacional de Formação de Docentes e Proffisionais da Educação (INFORDEPE), hanesan meus ida atu bele eleva koñesimentu, kapasidade no abilidade profesores hotu iha área hirak hanesan; dominiu-da-lingua, koñesimentu tékniku sientífiku, tékniku pedagójiku no éika morál. Konstrusaun ba edifisiu-das-eskolas mós presiza kontinua nafatin. Dezenvolvimentu ba kúrikulu  aprendijazem presiza ajusta nafatin tuir evolusaun siensia ne’ebé mundu infrenta. Atu dehan de’it katak, meus barak governu halo ona, hahú hosi governo da-uluk to’o governo da-hituk. Maske-nune’e, buat hirak ne’e-hotu sei hamosu nafatin dúvidas no kestoens barak iha públiku nia hanoin. 

Maluk lee na’in-sira, atu dezenvolve kualidade edukasaun, governo mós dudu seitór privadu (eskola partikulár) no kooperativa, la’os de’it atu oferese moris di’ak ba povu liu-husi atividades ekonómika sustentavel, maibé, liu-liu iha responsabilidade morál hodi suporta dezenvolvimentu edukasaun ne’ebé kualidade. Hanoin ida-ne’e, previstu mós iha baze legais edukasaun artigu 3.0 konabá liberdade de aprender e ensinar, iha númeru 3 ne’ebé deskreve “O ensino particular e cooperativo organiza-se e funciona nos termos de estatuto próprio, competindo ao Estado apoiá-lo nas vertantes pedagógica, técnica e financeira” (Fontes: As Bases Legais do Sistema Educação de Timor-Leste).

Iha dékade ikus Timor-Leste nia ukun rasik-aan ne’e, ita haré’e katak, setor privadu mós hatudu duni ona nia papél ativu. Iha fundasaun barak ne’ebé ita koñese muito bem, dedika sira-nia esforsu tomak no foku hodi dezenvolve edukasaun ne’ebé kualidade iha nasaun doben ida-ne’e. Fundação Klibur Mata Dalan ba Kooperativa,no Fila Liman, ne’ebé loke East Timor Institute of Business (IOB) no Escola Tecnica Informatica (ETI), Fundação Kristal ne’ebé loke eskolas hahú husi ensino baziku to’o ensino superior, Fundação BOAKRIL ne’ebé loke UNDIL, no seluk tan. Enjerál, ita haree katak kontribuisaun seitór privadu (eskolas partikulares/eskolas katólikas), hahú hatudu nia “dikur”.

Ita mós konsiente katak, eskolas partikulares barak maka iha kbiit no kapasidade finanseira rasik, nune’e bele prepara kondisaun ne’ebé di’ak liu, intermus-de-infrastruturas no fasilidades, inklui kualidade-de-ensinu. Maske-nune’e, ita mós hatene katak, balun sei depende maka’as (tane liman) ba laran di’ak governu nian, liu-husi fundus konsensoens públikas. Maibé, ida-ne’e la’os sai hanesan razaun ida para impede kualidade-de-ensinu, bainhira la-hetan apoiu (financeiro) husi governo.

 

Lian Ikus

Maluk lee na’in sira-hotu, se ita haree ba realidade hirak-ne’ebé mosu iha ita futar-matan, dala ruma ita bele foti konkluzaun katak governu (Ministeriu Edukasaun) no Fundasaun (Na’in ba eskolas partikulares) sira maka iha responsabilidade boot liu ba kualidade edukasaun iha nasaun doben ida-ne’e. Maibé, tuir ha’u-nia pontu-de-vista (talvez maluk lee na’in sira mós) katak, atu hasa’e kualidade edukasaun, tenke iha responsabilide konjunta no interligadu, la’os de’it husi governo (Ministeriu Edukasaun) no Setór Privado (eskolas partikulares), maibé entidades hotu ne’ebé iha intereses ba bem estar nasaun doben ida-ne’e nian iha futuru, liu-liu professores no estudantes sira.

Ha’u konkorda, enjerál governu maka iha responsabilidade hodi defini polítika edukasaun iha rai-laran. Prepara infrastrutura ho di’ak, estabelese kuríkulu ne’ebé kualidade. Nune’e mós eskolas partikulares sira, tenki iha kbiit atu harii infrastrutura ne’ebé di’ak no prepara kondisaun ne’ebé bele favorese kualidade. Maske nune’e, ha’u hanoin xave prinsipál liu maka iha professores no estudantes sira rasik.

Tanba sá? Tanba, kuandu profesores sira la-iha vontade atu aprende no hasa’e sira-nia koñesimentu, liu-liu iha área domíniu-da-lingua, koñesimentu tékniku sientífiku, tékniku pedagójika no étika profesionál, sa-ida de’it maka governo no fundasaun (eskolas partikulares) prepara sei la-haraik impaktu ba iha kualidade.

Profesores tenki tau profisaun nu’udar mestri/a (edukador) hanesan vokasaun ida, ne’ebé iha devér atu prepara jerasaun futuru ida-ne’ebé matenek no kualidade. Alende-ne’e, estudantes rasik mós tenki iha vontade no paisaun atu aprende no estuda siénsia no lingua. Tanba, Profesores atu bele matenek to’o oinsá, infrastrutura no kúrikulu bele iha kualidade aas, maibé bainhira estudantes ida la-iha vontade no paisaun atu aprende, estuda no aproveita oportunidade ne’ebé iha, buat hotu sei saugate de’it. 

Maluk lee na’in sira, bazeia ba diskrisaun ne’ebé maka hato’o ona husi inisiu, ha’u iha perguntas ida ba ita hotu; “Atu hasa’e kualidade edukasaun iha Timor-Leste, se-loos maka responsabiliza”? Ida-ne’e hanesan refleksaun ba maluk le’e na’in sira hotu***

KAMPUS

Campus A Akadiruhun

Akadiruhun Bidaun Dili

iobtiles02@gmail.com

+670 7833 0608


Campus B Avenida Luromata

Avenida Luromada Komoro DILI

iobtiles02@gmail.com

+670 7833 0608


Campus C Fomentu II

Rua Fomentu II Komoro DILI

iobtiles02@gmail.com

+670 7833 0608


Campus D Fomentu II

Rua Fomentu II Komoro DILI

iobtiles02@gmail.com

+670 7833 0608